http://hk.apple.nextmedia.com/enews/realtime/20140519/52491975
康城直擊】與長澤正美陷苦戀
金城武拍咀戲感尷尬
喺香港時間噚晚9點左右,金城武喺法國康城接受訪問。
講到噚日記者會大家話睇金城武嘅戲長大?佢就笑笑口話冇乜嘢,仲話第一次見黃曉明時,對方都係咁講,因為自己出道比較早,作品都多,所以覺得OK,幾有趣,佢又話:「我都會說看誰的電影長大,曾經跟一些演員說過。」記者追問時,佢就話係吳君如。
至於拍《太平輪》嘅時候最辛苦係咩? 金城武話係演感情戲,要有悽慘心情之餘,仲要將年代背景講出嚟。講到佢黑咗好多?佢話係為咗拍《太平輪》,導演再俾呢個機會佢,佢覺得好幸運,上次拍赤壁,今次做軍醫,不過自己唔係好需要拍爆破,所以生理上乜冇辛苦嘅地方。
講到康城畀金城武嘅感覺係點?佢就話天氣好好,好幸福,每次來天公都造美,又有美麗景色,好開心又難得。
記者提到佢近年接好少戲,點解會接拍《太平輪》? 金城武就自爆其實係執二攤:「其實我很幸運,因為之前赤壁應該是第二個演員的,情況有變才找我,那時候聽過有這一部戲,也聽過是另外的演員演的,但後來導演找我,劇本那麼好,沒有不演的理由。」佢又話近年作品唔多並非刻意,只係有時睇劇本,會覺得角色唔需要佢去做,就會拒絕。
對於《太平輪》被形容為中國版鐵達尼?金城武就話兩者內容完全唔同,而自己睇劇本時,已諗到成個畫面,大讚導演並非只係動作片導演。
對於吳宇森話呢部係金城武從影以來最好嘅電影? 金城武就尷尬咁笑,然後話自己每部戲都盡力做,今次演戲少咗語言方面困難,可以全心投放感情。
問到電影最感動佢係咩?佢話:「活著是充滿希望,過程中的悽慘大家可能會有同感,而且戲中描寫的感情很細緻。」
問到金城武覺得兩次同導演合作,對方亦都係大病初癒,對方有冇唔同?佢話:「導演的心態沒有改變,一樣熱愛電影,現場拍攝時,沒有見過導演發脾氣,他只專注的在想方法解決難題,他每天只休息一、兩小時,我們都擔心他叫他快休息,我被導演感動,對他好敬佩。」
咁金城武自己有冇諗過做導演?佢話20歲嗰時想,之後講笑話,好幸運之後同國際級導演合作,知道係好攰嘅一件事,所以0依家冇諗,但都好敬佩佢哋。
講到日前記者會片花入面,睇到金城武同長澤正美錫錫嘅片段?佢話二人喺戲中係苦戀,拍錫錫戲時,因為大家唔熟,所以都幾尷尬,自己主動要求拍之前,要先同對方傾偈了解下,傾偈時要當對方係親密嘅人,叫工作人員唔好行埋嚟。
採訪:文國駿
攝影:仇志德